សៀមរាប៖ អភិបាលខេត្តសៀមរាបលោក ទៀ សីហា បានឱ្យដឹងថាគម្រោងផ្លូវ៣៨ខ្សែក្នុងក្រុងសៀមរាបដែលបានបញ្ចប់ការសាងសង់កាលពីចុងខែធ្នូ ឆ្នាំ២០២១ នឹងគ្រោងសម្ពោធដាក់ឱ្យប្រើប្រាស់នៅថ្ងៃទី៤ ខែមេសា ឆ្នាំ២០២២ ខាងមុខ ពោលពីមុនពិធីបុណ្យចូលឆ្នាំប្រពៃណីជាតិចាប់ផ្ដើម។

ថ្លែងនៅក្នុងពិធីប្រកាសតែងតាំងអភិបាលរងខេត្តសៀមរាប កាលពីព្រឹកថ្ងៃទី១១ ខែមីនា ឆ្នាំ២០២២ អភិបាលខេត្តសៀមរាបលោក ទៀ សីហា បានលើកឡើងថាបច្ចុប្បន្នការសាងសង់បានសម្រេច១០០ភាគរយហើយ នៅតែបំពាក់បន្ថែមប្រព័ន្ធភ្លើងសាធារណៈ និងការងារផ្សេងទៀត ហើយគ្រោងនឹងសម្ពោធដាក់ឱ្យប្រើប្រាស់ជាផ្លូវការនាថ្ងៃទី៤ ខែមេសា ឆ្នាំ២០២២ខាងមុខ ដោយនាយករដ្ឋមន្ត្រីកម្ពុជាសម្ដេចតេជោ ហ៊ុន សែន និងសម្ដេចកត្តិព្រឹទ្ធបណ្ឌិត។

លោកថា៖ «បើទោះជាស្ថិតក្នុងដំណាក់កាល នៃផលប៉ះពាល់ ដោយសារជំងឺកូវីដ១៩ ធ្ងន់ធ្ងរក៏ដោយ ក៏រដ្ឋបាលខេត្ត ដោយមានការគាំទ្រពីរាជរដ្ឋាភិបាល បានយកចិត្តទុកដាក់លើការកែលម្អសោភ័ណភាពក្រុងសៀមរាប ឱ្យបានកាន់តែល្អប្រសើរថែមទៀត»។

គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ខេត្តសៀមរាបចំនួន៣៨ខ្សែ មានប្រវែងសរុប ១០៦,៤២គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩ ២១៦ ៥៩៥ ដុល្លារអាមេរិក ដោយក្នុងនោះចំនួន៩លានដុល្លារអាមេរិកចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់មានប្រវែងសរុប ២៤៨,៧២គីឡូម៉ែត្រ ចំណាយពេលសាងសង់ចំនួន១៣ខែ ចាប់ពីថ្ងៃទី៣០ ខែវិច្ឆិកា ឆ្នាំ២០២០ នឹងបញ្ចប់ការសាងសង់នៅចុងឆ្នាំ២០២១៕